Félix Caballero

Téñoo escrito neste mesmo medio: a TVG é unha canteira extraordinaria de presentadoras, e digo ben, presentadoras, máis ca presentadores, aínda que deles tamén. A última descuberta –que non a derradeira– é Rocío Delgado. Non se trata de ningunha novata. Ten xa 38 anos e –o que é máis importante– unha notable traxectoria en TeleMadrid desde 2008 e tamén en TVE, aínda que nesta canle só a partir de setembro deste ano, apena un mes antes de se incorporar ao programa “Xuntos en directo” da Televisión de Galicia. Aínda que naceu en Vigo, é a primeira vez que traballa na TVG.

Alén de ser guapa e estilosa –o que non é cousa fútil na televisión–, ten telexenia –que no é o mesmo ca beleza, aínda que esta sempre axuda– e desenvólvese moi ben como presentadora dun magazine como o que lidera agora na Televisión Galega, malia que en TeleMadrid traballase fundamentalmente en informativos, mesmo presentándoos.

En “Xuntos en directo” ten como compañeira de presentación á cantante Pili Pampín, que cada vez vai gañando máis peso como presentadora de televisión, un pouco na liña da grande Ana Kiro, que nos últimos anos da súa carreira demostrou que presentaba tan ben coma cantaba.

É curioso que, en contra do modelo tradicional do dúo de presentadores dos programas de televisión, formado sempre por un home e unha muller –quen non lembra a Joaquín Prat e Laura Valenzuela en “Galas del Sábado”?– , a TVG está a apostar nos últimos anos por parellas do mesmo sexo. En “Xuntos en directo” son dúas mulleres, pero, por exemplo, en “Quen anda aí” temos dous homes: Roberto Vilar e Juan Fuentes, que substituiu a Rodrigo Vázquez tras a fichaxe deste por TVE.

Polo demais, “Xuntos en directo”, que se emite os sábados e domingos a partir das 15.45 horas, é un magazine de tarde en directo que ten como particularidade a súa declaración de intencións contra o idadismo –a discriminación dos vellos–. O programa cóntén entrevistas, música, reportaxes e diferentes seccións, nada novo neste tipo de espazos, pero desde a perspectiva de diferentes xeracións. Un equipo de colaboradores de entre 18 e 80 anos tenta debullar unha imaxe completa de Galicia, mirando o pasado mais tamén o máis vangardista do presente, e permitir que mozos e maiores descubran afinidades e diferenzas. Un programa para que avós, pais e netos senten xuntos perante o televisor, como acontecía nos vellos tempos.

Entre os colaboradores figura outra moza que se ten revelado tamén tan boa presentadora como cantante: Tania Veiras, quen, xunto a Rubén Diumaró, interpreta cada tarde os éxitos que marcaron os máis maiores e os máis novos.

Moito éxito a “Xuntos en directo” e que continúe a extraordinaria canteira de presentadoras e presentadores da TVG.